განიახლე, განიახლე, მძლეთა მძლე,

დიახ, მძლე და მშვენიერი სიმაღლე,

ჰე, მამულო! გულისთქმად ეს იახლე:

ყოველი დღე იყოს მხოლოდ სიახლე!

გუშინდელმა გაიარა გუშინა,

წინანდელმა გული ვერ შეუშინა,

დღევანდელ დღეს ბაღი შემოუშენა:

ყოველი დღე უნდა იყოს სიახლე!

ამ სიახლის სიხარული განაგებს

ახალ ველებს, ახალ დაბა-ქალაქებს.

ცოდნა, შრომა სახლ-კარს მიმოალაგებს:

ყოველი დღე უნდა იყოს სიახლე!

ეს დიდი დღე ახლა მას გვეუბნება -

ადამიანს დაემონა ბუნება,

გვმართებს კიდევ ერთხმად დაგუგუნება:

ყოველი დღე უნდა იყოს სიახლე!


აწმყო გვეტყვის: განვლილს დევგმირთა მიერ,

თქვენ გაიარეთ ნათელი გზით ამიერ!

სამშობლოს კი - ერთხმად მრავალჟამიერ!

ყოველი დღის მარადისი სიახლე!

1950